Gold and Silver price today : सोने (Gold) आणि चांदी (silver) च्या किमतीत होणारी घट गुंतवणूकदारांना धक्के देत आहे. गेल्या दोन दिवसांमध्ये या मौल्यवान धातूंच्या किमतीत चांगलीच घसरण झाली आहे. याच काळात शेअर बाजारातही  (Stock market) घसरण दिसून आली. यंदा सोन्याने गुंतवणूकदारांना जसा चांगला परतावा दिला, तसाच परतावा शेअर बाजारांनीही दिला. मात्र, आता दोन्हीमध्ये घसरण दिसून येत आहे. गेल्या साडेतीन महिन्यांमध्ये सोन्याच्या किमतीत प्रति १० ग्रॅमसाठी जवळपास ७,७०० रुपयांची घट झाली आहे.

Must Read

1) कोल्हापुरात कडक बंदोबस्त,पोलिस सज्ज

2) जिल्ह्यात आज १९ रूग्णांची भर

3) मोठी बातमी : 'कोविडशील्ड' लशीमुळे गंभीर साइड-इफेक्ट; 5 कोटींच्या नुकसान भरपाईची मागणी

4) डिसेंबर महिन्यात १४ दिवस बँका बंद राहणार

5) कोरोना रुग्णांच्या संख्येत वाढ कायम

6) हार्दिक पांड्याने मध्येच हा निर्णय घेऊन सर्वांना दिला आश्चर्याचा धक्का

करोनावरील लस दृष्टिक्षेपात असल्याचे वृत्त थडकत असल्याने सोन्याच्या किमतीत घसरण होत आहे. गुरुवारी मल्टि कमोडिटी एक्स्चेंजवर (Multi Commodity Exchange) चार डिसेंबरच्या सोन्याच्या वायद्यांत ११ रुपयांची किरकोळ वाढ होऊन ते प्रति दहा ग्रॅमसाठी ४८,५२४ रुपयांच्या पातळीवर उघडले. चांदीच्या किमतीतही ०.५० टक्क्यांची तेजी दिसून आली. चांदीमध्ये २९९ रुपयांची वाढ होऊन ती प्रतिकिलोसाठी ६०,१४२ रुपयांवर जाऊन पोहोचली.

सोने ४९ हजारांखाली

सध्या सोन्याचा भाव प्रति दहा ग्रॅमसाठी ४८,५२४ रुपये आहे. गेल्या आठवड्यात सोन्याच्या भावात प्रति दहा ग्रॅम १६०० रुपयांची घट नोंदविण्यात आली. सोन्याचा सर्वोच्च भाव सात ऑगस्टला प्रति दहा ग्रॅमसाठी ५६,२०० रुपयांवर पोहोचला होता. त्यानंतर साडेतीन महिन्यांच्या कालावधीत हा भाव ७७०० रुपयांनी घटला आहे. याच कालावधीत चांदीच्या प्रति किलो भावामध्येही १७,००० रुपयांची घसरण नोंदविण्यात आली आहे.

सोने आणखी घसरणार?

आगामी काळात लशीच्या आगमनामुळे करोनाची भीती काही अंशी तरी कमी होण्याची शक्यता आहे. त्यामुळे सोन्याच्या भावामध्ये घसरण होत आहे. त्यातच अमेरिकेत जो बायडन यांनी निवडणुकीत विजय मिळवला असून, ते आता सत्ता स्थापन करण्याच्या तयारीत आहेत. बायडन सत्तेवर येत असल्याने चीनबरोबर सुरू असणारे व्यापारयुद्ध शांत होण्याची शक्यता वर्तविण्यात येत आहे. व्यापारयुद्ध शांत झाल्यास जगभरात आर्थिक व्यवहार पूर्वपदावर येण्याची शक्यता आहे. आर्थिक संकट कमी होण्याच्या शक्यतेने सोन्याची चमक झाकोळण्याची शक्यता वर्तविण्यात येत आहे.

अर्थव्यवस्थांत वेगवान सुधारणा

भारत, अमेरिकेसह जगभरातील अर्थव्यवस्थांमध्ये वेगवान सुधारणा होत आहे. त्यामुळे गुंतवणूकदार आता सोन्याऐवजी कंपन्यांच्या समभागांमध्ये गुंतवणूक करण्यास प्राधान्य देत आहेत. त्यामुळेही सोन्याच्या किमतीत घसरण होत आहे. सध्या जागतिक बाजारांमध्ये सोन्या-चांदीच्या किमतीत किरकोळ तेजी आली आहे. न्यूयॉर्कमध्ये स्पॉट गोल्डच्या किमतीत ०.१ टक्के तेजी येऊन ते प्रति औंस १८०९.७४ डॉलरवर पोहोचले आहे. त्याच वेळी चांदीच्या किमतीत ०.२ टक्क्यांची वाढ होऊन ते प्रति औंस २३.२५ डॉलरवर पोहोचले आहे.