Main Featured

कोकणात निघालेल्या गणेशभक्तांच्या मार्गात विघ्न


ganesh festकोकणात गणेशोत्सवासाठी जाणाऱ्या चाकरमान्यांच्या मार्गात अडचणींचे डोंगर उभे ठाकले आहेत. विलगीकरणाचा कालावधी ठरत नाही, एसटी-रेल्वेची सेवा बंद आणि अशातच आता गावी जाण्यासाठी ई-पासही मंजूर होत नसल्याने डोकेदुखी वाढली आहे. पोलिसांच्या वेबसाइटवर वैद्यकीय कारणांसाठी आणि अडकलेल्यांसाठी अशा दोनच कारणांसाठी ई-पासची व्यवस्था असल्याने नेमके कारण द्यायचे तरी काय असा प्रश्न चाकरमान्यांना पडला आहे.

कोकणात घरोघरी गणेशोत्सव साजरा होत असल्याने मुंबई-पुण्यासारख्या मोठ्या शहरांतून लाखो चाकरमानी दरवर्षी या सणासाठी गावी जातात. रेल्वे, एसटी, खासगी लक्झरी, खासगी वाहने असे अनेक पर्याय चाकरमान्यांना कोकणात जाण्यासाठी उपलब्ध असतात. मात्र यंदा करोनाच्या संकटामुळे रेल्वे बंद आहे. एसटी सोडायची की नाही याबाबतही अद्याप ठोस निर्णय झालेला नाही. त्यातच विलगीकरण कालावधीवरून राजकारण रंगले आहे. गणेशोत्सव महिन्यावर येऊन ठेपला तरी शासनाकडून काहीच मार्ग दिला जात नसल्याने चाकरमानी अडचणीत सापडले आहे. शासन निर्णय घेईल, तेव्हा घेईल; ऐनवेळी वाहतूक कोंडी तसेच इतर संकटामध्ये अडकण्यापेक्षा चाकरमान्यांनी आतापासून गावाला जायची तयारी सुरू केली आहे. यासाठी त्यांनी खासगी वाहनांचा पर्याय निवडला आहे. परंतु या मार्गातही त्यांना अडचणी येत आहेत.

पोलिसांच्या वेबसाइटवर ई-पाससाठी दोन पर्याय आहेत. पहिल्या पर्यायामध्ये वैद्यकीय आपत्कालीन गरज तसेच व्यक्ती मृत झाल्यास गावी संबंधित स्थळी जाण्याची परवानगी आणि दुसऱ्या पर्यायामध्ये अडकलेले श्रमिक, विद्यार्थी, यात्रेकरू, पर्यटक यांच्यासाठी ई-पासची सुविधा आहे. त्यामुळे गावी जाण्यासाठी नेमका कोणता पर्याय निवडायचा असा प्रश्न चाकरमान्यांना पडला आहे. दोन्ही पर्यायांपैकी एकाची निवड करून अर्ज केल्यास त्यास मंजुरी मिळत नाही. या छोट्या पण महत्त्वाच्या बाबींकडे शासन, राजकीय नेते लक्ष देणार की केवळ राजकारण करत बसणार, असा सवाल संतप्त चाकरमान्यांकडून उपस्थित केला जात आहे.

ई-पास मिळवून देणाऱ्या एजंटचा मुंबई, पुणे, नाशिकसारख्या शहरांमध्ये सुळसुळाट आहे. स्वतःहून केलेल्या अर्जाला मंजुरी मिळत नाही; मात्र एजंटमार्फत अर्ज केल्यास तो तत्काळ मंजूर होतो. अंधेरीतील एक चाकरमानी गावी जाण्यासाठी निघाला. त्याने ई-पाससाठी अनेकदा अर्ज केला; मात्र तो नामंजूर झाला. अखेर त्याने एका एजंटशी संपर्क साधला. तिघांच्या ई-पाससाठी एजंटने दीड हजार रुपये घेतले. शासनाने चाकरमान्यांसाठी व्यवस्था न केल्यास गणेशोत्सवकाळात एजंटकडून अशीच आर्थिक लुबाडणूक केली जाण्याची शक्यता आहे.