Main Featured

१६ वर्षाच्या मुलीचे शौर्य; तालिबानी दहशतवाद्यांनी पळ काढला!


maharashtra timesअफगाणिस्तानमध्ये Afghanistan तालिबानी दहशतवाद्यांचे हल्ले अद्यापही थांबले नाहीत. तालिबानी दहशतवाद्यांच्या हल्ल्यात हजारो निष्पाप नागरिकांना प्राण गमवावे लागले आहे. तालिबानी आणि सुरक्षा दलामध्ये चकमकी सुरूच असतात. त्यातच शांतता चर्चा सुरू असतानाही हे हल्ले थांबत नसल्यामुळे अफगाण सरकारची डोकेदुखी वाढली आहे. अफगाण सरकार समर्थक, तालिबानी बंधनांना झुगारून देणाऱ्या नागरिकांना तालिबानी दहशतवादी लक्ष्य करत आहेत. अफगाणिस्तानमध्ये Afghanistan सध्या एका १६ वर्षीय मुलीची जोरदार चर्चा सुरू आहे. तालिबान दहशतवाद्यांनीदेखील या १६ वर्षाच्या मुलीसमोर गुडघे टेकले आहे. त्यामुळेच या १६ वर्षीय कमर गुलची जोरदार चर्चा आहे. आपल्या आई-वडीलांची हत्या करणाऱ्या तालिबानच्या तीन दहशतवाद्यांचा कमर गुलने खात्मा केला. जाणून घेऊयात नेमकं काय आहे प्रकरण...

४० दहशतवाद्यांच्या हल्ल्याला तोंड देणारी कमर गुल

पाकिस्तानमधील तालिबानी दहशतवाद्यांच्या जीवघेण्या हल्ल्यात बचावलेली आणि पुन्हा आपले शिक्षण सुरू ठेवणाऱ्या मलाला युसुफजाईबद्दल अनेकांना माहिती आहे. कमर गुलची गोष्ट काहीशी वेगळी आहे. कमर गुलने फक्त तालिबानच्या दहशतवाद्यांचा मुकाबला केला नाही. तर, तीन दहशतवाद्यांना आपल्या वडिलांच्या एके-४७ रायफलमधून कंठस्नान घातले. अफगाण सरकारला पाठिंबा दिल्याबद्दल कमर गुलच्या आई-वडिलांची तालिबानी दहशतवाद्यांनी घरात घुसून हत्या केली. या हत्येचा बदला कमर गुलने केला. कमरच्या गावावर जवळपास ४० हून अधिक दहशतवाद्यांनी हल्ला केला होता.

तालिबानसोबत एक तास झुंज
१७ जुलैच्या रात्री एक वाजण्याच्या सुमारास अफगाणिस्तानमधील घोर प्रांतात तालिबानी दहशतवादी गुल यांच्या घरात शिरले होते. त्यांनी केलेल्या गोळीबारात कमरच्या आई-वडीलांचा मृत्यू झाला. त्यानंतर कमर गुल आपल्या खोलीतून बाहेर निघाली आणि एके-४७ ने ताबडतोब गोळीबार सुरू केला. कमर गुलसोबत तिचा लहान भाऊदेखील होता. जवळपास एक तास सुरू असलेल्या या गोळीबारात तीन दहशतवादी ठार झाले. त्यानंतर इतर दहशतवाद्यांनी कमरच्या घरात शिरण्याचा प्रयत्न केला. मात्र, गावातील इतरांकडून दहशतवाद्यांना चोख प्रत्युत्तर मिळाले. त्यामुळे तालिबान्यांना पळ काढवा लागला. या घटनेनंतर आता अफगाणिस्तानमधील सुरक्षा दलाने कमर गुल आणि तिच्या लहान भावाला सुरक्षित स्थळी हलवले आहे.

जगभरात कमर गुलची चर्चा
कमर गुलच्या शौर्याची बातमी अफगाणिस्तानमध्ये वाऱ्यासारखी पसरली. जगभरातही तिने दाखवलेल्या धाडसाचे कौतुक होऊ लागले. सोशल मीडियावरही तिचे कौतुक सुरू आहे. मात्र, दहशतवादी हल्ला आणि आई-वडिलांच्या मृत्यूमुळे कमर गुल आणि तिच्या लहान भावाला धक्का बसला आहे. दहशतवाद्यांनी हल्ला केला आणि त्यात माझे आई-वडिल मृत्यूमुखी पडले. दहशतवाद्यांना प्रत्युत्तर देणे हा माझा अधिकारच होता, असेही तिने म्हटले. त्या गावामध्ये कमरचा सावत्र भाऊ सोडल्यास इतर कोणतेही नातेवाईक नाहीत. अफगाण सरकार आणि सुरक्षा दलाचे समर्थन करणाऱ्यांना तालिबानी दहशतवादी लक्ष्य करतात.

राष्ट्रपतींकडून कौतुक
तालिबानी दहशतवाद्यांशी दोन हात करणाऱ्या कमर गुलचे राष्ट्रपती अशरफ गनी यांनीदेखील कौतुक केले आहे. कमर गुल आणि तिच्या भावाला त्यांनी भेटीसाठी राष्ट्रपती भवनात आमंत्रित केले आहे. राज्यपाल मोहम्मद रफीक आलम यांनी सांगितले की, घटनेच्या त्या दिवशी कमर गुल आणि तिच्या भावाला धक्का बसला होता. मात्र, तालिबानी दहशतवाद्यांना ठार केल्यामुळे त्यांना त्याचे समाधानही वाटत होते. अफगाणिस्तानमध्ये २००१ पासून सुरू झालेल्या संघर्षात आतापर्यंत एक लाख अफगाण नागरीक मारले गेले आहेत.